पुणे : ‘प्रत्येकाच्या आयुष्यात समस्या आहेतच. त्या कुणालाही चुकलेल्या नाहीत. आपला जन्म कशासाठी झाला असा प्रश्न अनेकांना पडतो, तर त्याचे उत्तर ‘या समस्या सोडवण्यासाठीच’ असे आहे. समस्या संपल्या की जन्मच संपला. या प्रश्नांची उत्तरे शोधणे किंवा समस्यांची उकल शोधणे हेच खरे अध्यात्म आहे. गहन रूप असलेले अध्यात्म सहज कसे होऊ शकते हे सुधीर काळे यांनी लिहिलेल्या ‘अवघे हरिमय योगबळे’ या पुस्तकाच्या माध्यमातून सर्वांना वाचायला मिळेल. हे पुस्तक अध्यात्माच्या दिशेने जाणाऱ्यांना मार्गदर्शक ठरेलच; पण अध्यात्मात रस नसलेल्या व्यक्तींनी जरी हे पुस्तक वाचले, तरीही त्या गोष्टीतील हिमालयातील प्रवास वाचताना त्या रममाण होतील,’ असा विश्वास योगगुरू किरण पांडे यांनी व्यक्त केला.

सुधीर काळे यांच्या ‘अवघे हरिमय योगबळे’ या पुस्तकाच्या दुसऱ्या आवृत्तीचे आणि ई-बुकचे प्रकाशन रविवारी (२९ डिसेंबर २०१९) पुण्यात वेदशास्त्रोत्तेजक सभागृहात झाले. या कार्यक्रमाच्या अध्यक्षस्थानी किरण पांडे होते, तर प्रमुख पाहुणे म्हणून स्वामी विद्यानंदांचे अंतरंग शिष्य दास विद्यांकुर तथा प्रल्हाद अवचट उपस्थित होते. या वेळी बुकगंगाच्या संचालिका सुप्रिया लिमये, लेखक सुधीर काळे आणि त्यांच्या पत्नी स्वाती काळे आदी मान्यवर व्यासपीठावर उपस्थित होते. योगगुरू किरण पांडे हे पावसच्या स्वामी स्वरूपानंदांचे शिष्य आहेत.

योगगुरू पांडे म्हणाले, ‘मी हे पुस्तक दोन दिवसांत वाचले. यामध्ये असलेल्या गोष्टीत प्रत्येक व्यक्ती स्वत:ची व्यक्तिरेखा शोधेल; पण माझे म्हणाल तर मला या गोष्टीतील नायक निरंजनची कथा ही माझीच कथा वाटली. दोघांची परिस्थिती, आलेले काही आध्यात्मिक अनुभव सारखेच आहेत. पुस्तकाच्या शेवटी निरंजनचे मनोगत आहे ते आधी वाचा, मग पुस्तक वाचा, असा सल्ला मी वाचकांना देईन. सद्गुरू स्वामी स्वरूपानंदांच्या अभंगाच्या शेवटच्या ओळी ‘अवघे हरिमय योगबळे’ हेच या पुस्तकाचे नाव आहे हे उत्तम झाले. हे पुस्तक म्हणजे ललित स्वरूपात मांडलेले ओघवते अध्यात्म आहे. त्यामुळे त्याच्या वाचनाने वाचक मनरूपाने सद्गुरूंपर्यंत पोहोचावा अशी अपेक्षा आहे.’

प्रल्हाद अवचट म्हणाले, ‘सामान्यपणे पुस्तकाचा उपयोग मस्तकापर्यंत असतो. ग्रंथ हा शरीरातील ग्रंथीग्रंथीपर्यंत झिरपतो आणि ‘अवघे हरिमय योगबळे’ याला पुस्तक नव्हे, तर ग्रंथ म्हणायला हवे. हे पुस्तक वाचल्यावर मला संत तुकाराम महाराजांच्या निर्वाणावेळच्या अभंगांचीच आठवण झाली. सध्याच्या जीवनात माणसाला खरा धर्म काय आहे हे माहीतच नसते. तो ज्या गोष्टींना धर्म समजतो त्या वेगळ्याच असतात. आजूबाजूच्या परिस्थितीमुळे, जीवनात निर्माण झालेल्या समस्यांची उकल न सापडल्यामुळे विमनस्क अवस्थेत असलेल्या माणसाने काय करायला हवे याचे संपूर्ण वर्णन या पुस्तकात आहे. हे पुस्तक म्हणजे प्रवासवर्णन आहे; पण या प्रवासवर्णनातील लेखकाचे व इतर पात्रांचे अनुभव अत्यंत महत्त्वाचे आहेत. त्यामुळे हे पुस्तक सर्वांनी वाचायलाच हवे.’

बुकगंगा पब्लिकेशन्सच्या संचालिका सुप्रिया लिमये म्हणाल्या, ‘ पुस्तकांचा अमूल्य ठेवा सर्वांना उपलब्ध व्हावा, तसेच मुद्रित पुस्तके डिजिटल स्वरूपात यावीत, श्राव्य स्वरूपात यावीत यासाठी बुकगंगा पब्लिकेशन्स अनेक वर्षे प्रयत्न करत आहे. साखरप्यातील मुलींना प्रशिक्षित करून त्यांना ई-बुक तयार करण्याचे प्रशिक्षण बुकगंगाने दिले आणि इंटरनेटवर ही पुस्तके सर्वांसाठी उपलब्ध झाली. मराठीतील दर्जेदार साहित्य प्रकाशित करण्यासाठी बुकगंगा सतत प्रयत्नशील आहे. बुकगंगाचे संस्थापक मंदार जोगळेकर यांनी ‘अवघे हरिमय योगबळे’ हे पुस्तक वाचल्यानंतर त्याची दुसरी आवृत्ती बुकगंगा पब्लिकेशन्स प्रकाशित करेल असे ठरवले. या पुस्तकाच्या प्रसिद्धीमुळे ‘बुकगंगा’च्या शिरपेचात मानाचा तुरा खोवला गेला आहे.’

‘माझ्या पुस्तकाची अवघ्या एका वर्षात दुसरी आवृत्ती काढावी लागते ही समाधानाची बाब आहे. सर्वांत आनंदाची गोष्ट म्हणजे आमचे सद्गुरू स्वामी विद्यानंद यांनी माझ्याकडून हे पुस्तक लिहून घेतले. आतापर्यंत केलेली साधना, अभ्यास याचे सार या पुस्तकात मांडण्याचा प्रयत्न केला आहे. मी कवी नाही. त्यामुळे पुस्तकात अवतरलेले काव्य ही सद्गुरूंची कृपाच आहे,’ अशा शब्दांत लेखक सुधीर काळे यांनी आपले मत व्यक्त केले.

सुनील थिटे यांनी लेखक काळे यांचा तर सुलभा मेनन यांनी योगगुरू किरण पांडे, दास विद्यांकुर यांचा परिचय करून दिला. पुस्तकाच्या निर्मितीला विविध पद्धतीने हातभार लावणाऱ्या स्वाती काळे, सुलभा मेनन, सुरेश लिमये, सुचेता राशिनकर, मंदाकिनी अवचट, सुनील थिटे, माणिक गोडबोले आणि बुकगंगा पब्लिकेशन्सच्या संचालिका गौरी बापट यांचा या वेळी विशेष सत्कार करण्यात आला. अॅड. सुनीता पागे यांनी सूत्रसंचालन केले.